“POR A SOBIRANÍA D’OS PUEBLOS, NO A LA UNIÓN EUROPEA”

Organizacions socials, sindicals y politicas d’Europa subscribimos este manifiesto en o qual queremos endrezar-nos a treballadoras y treballadors de tot o continent:


Refusamos a Unión Europea como estructura politico-economica, militar y cultural de dominación d’os pueblos y a clase treballadera que tiene como obchectivo mantener o sistema capitalista, imperialista y patriarcal en beneficio d’uns pocos.
Vivimos tiempos d’incremento d’o faixismo, tiempos de racismo y xenofobia, de masclismo y violencia contina contra as mullers y cuerpos disidents, de zarre de buegas y vulneración d’os dreitos individuals y colectivos, tiempos d’empobrimiento d’a población y perdua de dreitos laborals, tiempos de destrucción d’os territorios y l’agricultura local, y d’expolio d’os recursos tanto adintro como que difuera d’a Unión Europea, tiempos de privatizacions y retalles exichius por o capital, tiempos de exodos migratorios dende adintro y difuera d’a Unión Europea, tiempos de represión a qui se moviliza, canta u escribe contra o poder establiu, tiempos de negación d’o dreito a la libre autodeterminación d’os pueblos, tiempos d’intensificación d’as agresions imperialistas por parte d’os Estaus Unius d’America, a Unión Europea y a OTAN… A la finitiva, tiempos d’agresión contra os pueblos y o conchunto d’a clase treballadera.


Pero tenemos claro que no ye una situación conchuntural que se restablirá con o tiempo, sino que ye estructural: a respuesta d’os poders d’a Unión Europea pa seguir desembolicando y perpetuar asinas o sistema d’acumulación capitalista. Y ye que a Unión Europea naixió precisament pa esfender y mantener os intreses d’as elites europeas, por muito que nos haigan quiesto amostrar una cara amable.


Por ixo, manifestamos que no ye posible reformar a Unión Europea pa que responda a os intreses d’os pueblos y as clases populars. La Troika, a Comisión Europea, a OTAN, EUROPOL,… son estructuras totalment antidemocraticas y o Parlamento Europeu un organismo inoperant y parasitario a o servicio d’as elites y as transnacionals. Qualsiquier alternativa de democratización pasará por la deconstrucción d’a Unión Europea y a construcción d’un modelo d’integración que, dillá de l’actual aria cheografica, será basau en a solidaridat y a sobiranía d’os pueblos.
Por tanto, as organizacions que sinyamos iste manifiesto femos un clamamiento a incrementar a solidaridat internacionalista y empecipiar conchuntament a disenyar una alternativa a la Unión Europea, a o servicio d’os pueblos y d’a clase treballadera.